വള

             
കരിവള കൈകൾ കൊട്ടി
എത്ര ചിരിച്ചിട്ടുണ്ട് നീ
എത്രയുംഇഷ്ട്ടമായിരുന്നില്ലെ
നിനക്ക് കരിവള
പിന്നെ പിന്നെ കുപ്പിവളയായി
അവയുടെ കിലുക്കത്തിൽ
കുലുങ്ങിചിരിക്കുമ്പോഴുമുണ്ടാ
യിരുന്നില്ലല്ലോ നിനക്ക്
മുന്നേത്തെ അത്രയും കൗതുകം.
കാലംകുഞ്ഞുടുപ്പും കള്ളിപ്പാവാ-
ടയും ഒതുക്കിപ്പിടിച്ച് കടന്നു പോയപ്പോൾ
എവിടെ വെച്ചായിരുന്നു നിന്നിലെ
കരിവളക്കാരി നഷ്ട്ടമായത്
വർണ്ണങ്ങളുടെമനംമയക്കുന്ന
പൊട്ടാതവളകൾ വാരിയണിഞ്ഞ്
നീ പോയപ്പോൾ
കുപ്പിവളപ്പൊട്ടുകൾ പോലെ
തട്ടി മാറ്റിയത്
അന്ന് കരിവളയണിയിച്ച്
നെഞ്ചോട് ചേർത്തു പുണർന്ന
ശോഷിച്ച കൈകളെയായിരുന്നു