അമ്മ മണം

ആ വീടിനിപ്പോഴും അമ്മ
മണമാണ്...
അമ്മ മണം മനസ്സിലിലാത്ത
മക്കൾ
മരിച്ചമക്കളാണ്!

എന്നും അമ്മ മണമായിരുന്നു
എൻ്റെ കരുത്ത്;
ആ കരുത്തായിരുന്നു എൻ്റെ
ഏകാന്തതയ്ക്ക് കൂട്ട്.

എൻ്റെ ബാല്യം, യൗവ്വനം,
എൻ്റെ ശക്തി സത്യം...
അരുതായ്മകളെ ഉൺമയാ
ക്കിയ ആ വെൺമ,
തീരാദു:ഖത്തെയകറ്റിയ
സൂര്യ തേജസ്!

ആ വീടിനിപ്പോഴും അമ്മ
മണമാണ്....
വീട്, ഒരമ്മയാണ്!

ഗ്രാമം

 

ഗ്രാമം സുന്ദരിയായൊരു -
യുവതിയായിരുന്നു;
നഗരം ആരാധനയോടെ
അകലെ നിന്ന് നോക്കി -
നിന്നു.

അവൻ പതുക്കെ പതുക്കെ
അവളുടെ അരികിലേക്കു -
വന്നു;
ആരാധന അനുരാഗമായി
അവൾ നാണിച്ച് തല കുനിച്ചു.

ഒരിക്കൽ അവൻ അവളുടെ
പേരു ചോദിച്ചു;
നാടും വീടും ചോദിച്ചു
എന്തു ചെയ്യുന്നുവെന്നും വീട്ടു -
കാരെക്കുറിച്ചും ചോദിച്ചു
അവൾ വിക്കി വിക്കി മറുപടി
പറഞ്ഞു.

പിന്നെ;
നാണം മാറി,
നമ്പർ കൈമാറി,
ചേർന്നു നിൽപ്പായി,
ചാറ്റിംഗായി.

വേനലിലും കുളിരായി,
വേർപിരിയാൻ കഴിയാതെയായി;
അവൻ്റെ പ്രലോഭനങ്ങളിലേക്ക്
വഴുതിക്കൊണ്ടേയിരുന്നു.

ഇന്ന്;
അവളെ കണ്ടാലറിയാതായി!
അവൻ വളർന്നു വളർന്ന്
ആരും കൊതിക്കുന്ന
ആരാധനാപാത്രമായി.

യുദ്ധം

വാക്കുകളിൽ
വരികളിൽ
നോക്കുകളിൽ
തോക്കുകളിൽ
ഞാൻ എന്നെ കാണുന്നു !

യുദ്ധം നീണ്ടു പോകുന്തോറും
പതാക പാറുന്ന പോസ്റ്റിനു കീഴെ
മുഷ്ടിയിലമർന്ന ഗ്രിഗറിൽ നിന്ന്
വിരലുകൾ തെന്നിപ്പോകുന്നു

പാത്തിയമർന്ന തോളിലെ
പഴുത്ത തഴമ്പുകൾ
തലച്ചോറിലെ ഞരമ്പിലേക്ക്
സൂചി കുത്തിയിറക്കുന്നു

ഞാനുതിർക്കുന്ന ഓരോ -
വെടിയുണ്ടയും
എൻ്റെ നെഞ്ചിലേക്ക് തന്നെ
തുളച്ചുകയറുന്നു !
തോക്കിൻകുഴലിലെ പുകയിൽ
ഞാൻ പുതഞ്ഞു നിൽക്കുന്നു

മരണത്തിൻ്റെ മഞ്ഞ വെളിച്ചങ്ങൾ
അലമുറയിട്ടു പായുമ്പോൾ
ഇമ്മാരണമൊന്ന് കഴിഞ്ഞെങ്കി -
ലെന്ന്
ഉള്ളം തേങ്ങുന്നു.

വിഭജനം

തിളങ്ങുന്ന,
മൂർച്ചയുള്ള കത്തി

നേർവഴി

നേർവഴിയറിയാ-
പോയൊരു നാളിൽ
നൽവഴികാട്ടി
തന്നവൾ നീ
ഇനിയും തെറ്റി വരേണ-
മെനിക്ക്
നിന്നിലെ നേർവഴിയറി -
യാൻ

കുട്ടിക്കവിത

 

മഴവില്ല്

ആഹാ... അഴകിൻ പൂന്തോട്ടം,
അരുമക്കിങ്ങിണി പൂന്തോട്ടം
ആരും മോഹിച്ചീടുന്ന
അരുണിമ വിതറും പൂന്തോട്ടം !

മൈനപ്പെണ്ണിൻ മിഴിയിണയിൽ
കവിത വിടർത്തിയ പൂന്തോട്ടം
ഉള്ളിൽ ഉത്സവമേളം തീർക്കും
വാർമഴവില്ലിൻ പൂന്തോട്ടം !

കൊഴിഞ്ഞു വീഴുന്ന ഇല

എത്ര പ്ലാവിലയാണ് പിന്നെയും വീഴുന്നത്?
ഇപ്പോഴല്ലേയെല്ലാം പെറുക്കിക്കളഞ്ഞത്?
പോരാത്തതിന് ഇപ്പോൾ മാവിലയും
ഒന്നുരണ്ടെന്നു പറന്നു വീഴുന്നു.

​ഉണ്ടൊരു മാവും പിലാവും തെങ്ങും
ഇക്കൊച്ചു മുറ്റത്തിന്നതിരിന്നരികിലായ്
കഞ്ഞികുടിക്കുവാൻ ഇല്ലാത്ത നാളിൽ
അമ്മ കൊണ്ടുവന്നുള്ള ചക്കയും മാങ്ങയും തേങ്ങയും

​അതിൽ നിന്നൊരു തേങ്ങ, ഒരു ചക്കക്കുരു, ഒരു മാങ്ങാക്കൊരട്ട
അവ നട്ടതാണീ പടർന്നു നിൽക്കുന്നത്
ഇന്നും കനി തന്നു കാത്തുകൊള്ളുന്നു
ഭൂതകാലത്തിലേക്കെന്നെ നടത്തുന്നു!

​ഇക്കുഞ്ഞിറയത്തെ ചാരുകസേരയിൽ
ചാഞ്ഞിരുന്നൊരു കുഞ്ഞായ് ഞാൻ കളിച്ചീടുന്നു
അമ്മയെന്നരികത്തിരുന്നു കൊണ്ട്
ഓരോരോ കാര്യം പറഞ്ഞു തന്നീടുന്നു.

​പട്ടിണിയിൽ പെട്ടു നട്ടം തിരിയവെ
പട്ടുപോകാതെന്നെ കാത്തുസൂക്ഷിക്കുന്നു
കഞ്ഞിവെള്ളത്തിൽ കണ്ണുനീരുപ്പിട്ട്
മൂടിക്കുടിച്ചമ്മ പോറ്റിയ നാളുകൾ
ഗദ്ഗതമായെൻ്റെ കണ്ഠനാളത്തിൽ
തിക്കിത്തിരക്കി വന്നു നിൽക്കുന്നു!

​പിന്നെയും പ്ലാവില വീണിരിക്കുന്നു
അവ ഓരോന്നും പെറുക്കിയെടുക്കവെ
വെള്ളികെട്ടിയ മുടി ഒതുക്കിടുന്നതുപോലെ...

​പ്രായമേറെയായെന്നോർമ്മിപ്പിക്കുകയാവാം
കൊഴിയാറായൊരില നീയെന്ന്
മെല്ലെ ചൊല്ലുകയാവാം!