ഇങ്ങനെയും ചില ജന്മങ്ങൾ

നിസ്സംഗതയാണ് പരിചയം

മൗനം ആയുധം

മനസ്സിൻ്റെ ഗുഹാന്തരത്തിൽ

ഓർമ്മകളുടെ ഇഴജന്തുക്കളും,

കടവാവലും മാത്രം

കാമകഴുകുകളാണ് കാഴ്ച

കരുത്തുള്ള കഴുകുകളാൽ വേഴ്ച

ചതുപ്പിൻ താഴ്ചയിലേക്കു വീഴ്ച

ഉള്ളിൽ കത്തുന്നു ഗ്രീഷ്മം

അവർ വെള്ളിക്കാശിന്  ഒറ്റുകൊടു-

ത്തു കൊണ്ടേയിരുന്നു

ഞാൻ ദേശദേശാന്തരം കുരിശേറ്റി -

ക്കൊണ്ടും

എൻ്റെ മടിക്കുത്തഴിച്ച് അവർ മടിശ്ശീല -

നിറച്ചു

ഞാൻ ശിശിരത്തിലെ ഇലകൊഴിഞ്ഞ -

മരം

നിലയ്ക്കാത്ത ഒരു കണ്ണീർചാൽ

കൺകോണിൽ നിന്നും പിറക്കുന്നു

പക്ഷികളൊഴിഞ്ഞ ഒരു ചില്ലയാണിന്നു -

ഞാൻ

വസന്തമിനിയില്ല വഹ്നിയിൽ ദഹിച്ച്

വിലയം കൊള്ളട്ടെ വീശുന്ന കാറ്റിൽ