ചില നിമിഷങ്ങളിൽ....!

ബന്ധങ്ങളെ
സൂക്ഷിച്ച് കൈകാര്യം ചെയ്യണം
ചില്ലുഗ്ലാസുപോലെ
തമ്മിലുരയാതെ.
ഓർമവേണം
ഉള്ളിന്റെ പൊള്ളുന്ന ഒരു തരിമതി
ഒരു ജന്മം തന്നെ കത്തി തീരുവാൻ.
ചട്ടിയും കലവുമാകുമ്പോൾ
തട്ടീം മുട്ടീം ഇരിക്കും
അതെ ,ആ തട്ടിനും,മുട്ടിനുമുണ്ട്
ഒരു മട്ടും ഭാവവും.
തലയിലൊരു കടലരുത്
ഇരുമ്പുന്ന തിരയാകരുത്
മൃതമാവാത്ത വീര്യമായി
ഒന്നും മനസ്സിൽ കൊണ്ടു നടക്കരുത്.
അറിയില്ല നമുക്ക്
എപ്പോഴാണ് അഗ്നിപർവ്വതം പൊട്ടുന്നതെന്ന്
സുനാമിയടിക്കുന്നതെന്ന്
ഭൂകമ്പമുണ്ടാക്കുന്നതെന്ന്
മനസ്സിനെ മാത്രം മനസ്സിലാക്കാൻ
കഴിഞ്ഞിട്ടില്ല ഇന്നുവരെ ആർക്കും
ഉള്ളിൽ ഒരു,രുളനക്കം തോന്നുമ്പോൾ
എടുത്തണിയണം
മൗനത്തിന്റെ ഒരാദിമഭാഷയെ.