മനസ്സ് പെയ്യുമ്പോൾ

മഴകണ്ടു നിൽക്കുമ്പോൾ മനസ്സു -
പെയ്തീടുന്നു
മറഞ്ഞു പോയുള്ളൊരാ ബാല്യം
എത്രയും സുന്ദര ചിന്തകൾ മാത്രം
നെയ്തുകൂട്ടീടിന കാല്യം

സ്വപ്നത്തിൻ മാത്രകൾ ചേർത്തു -
വച്ചന്നു നാം
കോർത്തെടുത്തഴകാർന്ന കൊട്ടാരം
സൂചിമുഖി പക്ഷികൾ വന്നിണചേരും
വാനം വിതാനിച്ച പൂന്തോട്ടം

വെയിൽത്തോറ്റ മാടുന്ന നട്ടുച്ചയിൽ -
പ്പോലും
നാട്ടു മാഞ്ചോട്ടിലാണന്നു വാസം
രാക്കിളിപ്പാട്ടു കഴിഞ്ഞൊരാ നേരത്തും
കാട്ടിലൂടെയുള്ള യാത്ര

ഇന്നും നിറഞ്ഞൊഴുകുന്നു മഴയോർമ്മ
മഴവറ്റി വരളുന്ന കാലത്തിലും
കാണാമറയത്തായ് അക്കാലമെങ്കിലും
കനവിലും കിനിയുന്നതുണ്ടുള്ളിലിന്നും