തീവണ്ടി

എത്രയോ നേരത്തെ

വന്നെത്തേണ്ട തീവണ്ടി
എത്താതതിനാൽ
സമയരേഖയോർക്കാതെ
അയാൾ കാത്തിരുന്നു

സമയമളക്കാൻ പറ്റാത്ത
ഒന്നാണ് തീവണ്ടി
സ്ഥലകാലബോധമില്ലാത്ത
ഒരു,രഗം
അനുസരണയില്ലാത്തത്,
ആശങ്കയാൽ ആത്മബോധം
നശിപ്പിക്കുന്നത്

ചിലപ്പോൾ ഇഴഞ്ഞിഴഞ്ഞ്
ചിലപ്പോൾ വിജനതയുടെ -
യിരുട്ടിനെ കീറി മുറിച്ചു കൊണ്ട്,
ഇരുട്ടിനെ പേടിയുള്ള കുട്ടി
ഉച്ചത്തിൽ വർത്തമാനം പറഞ്ഞ്
ഓടികിതച്ചെന്ന പോലെ.
മറ്റു ചിലപ്പോൾ, പീള കെട്ടിയ -
കണ്ണാലെ
ആർത്തി പെരുത്ത വിശപ്പുമായി

പലപ്പോഴുമുള്ള വിരസമായ
കാത്തിരിപ്പിനു ശേഷം
ഇടയ്ക്കൊരു കൃത്യത പാലിച്ചു
കൊണ്ട്
ഉന്മേഷവും, പ്രതീക്ഷയുമേകി
വന്നെത്തുന്ന
തീവണ്ടിയാണ് ജീവിതം