വാക്കുവറ്റിയ വീട്

വാക്കു വറ്റിപ്പോയ ഒരു വീട് ഞാനിന്നലെ കണ്ടു

വേർപിരിഞ്ഞവനെകാത്ത് സങ്കടപ്പെട്ടിരിക്കുന്ന -

ഒരുവളെപ്പോലെ

നിശ്ശബ്ദതയടെ ആഴക്കുഴിപോലെ നടുത്തളം

നിട്ടാനീളത്തിൽ വീണുകിടക്കുന്നതുപോലെ -

ചായിപ്പ്.

വീടകങ്ങളെല്ലാം ഓരോ ഉപഭൂഖണ്ഡങ്ങളാണ്

ശൂന്യതയും,നിരാശയും തളംകെട്ടിനിൽക്കുന്നയിടം

സങ്കടത്തിൻ്റെ ഒരു കൈക്കല തുണിയുണ്ട് - അടുക്കളയിൽ

ദീർഘനിശ്വാസം പോലെ ഇടയ്ക്കുയരുന്നുണ്ട്-

പാത്രങ്ങളുടെ ചെറുസ്വനം

ചില ഗന്ധങ്ങൾ ചിലനേരങ്ങളിൽ

വാതിൽപ്പഴുതിലൂടെ വെളിയിലേക്കിറങ്ങാറുണ്ട്

ജീവിച്ചിരിക്കുന്നു എന്നതിന് തെളിവായി വാക്കുക-

ൾ വേർപിരിയാത്ത എത്ര വീടുകളുണ്ടിന്നു നാട്ടിൽ?!

എന്നായിരിക്കുമിനി

ഏകാന്തതയുടെ പുറന്തോടു പൊട്ടിച്ച്

വറ്റിപ്പോയ വാക്കുകൾ

ഉറവയിടുന്നത്