വർത്തമാനത്തിലെത്തുന്ന ഭൂതകാലം
ചിന്തയുടെ ഒരുപൊറ്റ അവളുടെ
ചുണ്ടിലുറച്ചു.
സ്വപ്നങ്ങളുടെ ബീജങ്ങൾ
തെറിച്ചുവീണയിടമെല്ലാം
പുതുമുളകൾ നാമ്പിട്ടു
എന്നാൽ,
അവയെല്ലാം തനിക്ക് വിലക്ക-
പ്പെട്ടതെന്ന് ഇന്നവൾ തിരിച്ചറിയുന്നു
ജീവിതത്തിൻ്റെ താളുകൾ തുന്നി-
ക്കൂട്ടാൻ
എത്രകാലമായി ഈ ഉമ്മറപ്പടിയിൽ
നിൽക്കുവാൻ തുടങ്ങിയിട്ട് !
കൽക്കരിപോലെ ഉള്ളം കത്തുമ്പോഴും
ചില ചിരികളുണ്ട് ജീവിതത്തിൽ
കണ്ണുകളോളമെത്തിയ കരച്ചിലിനെ
തടയാനുള്ള ഒരു ശ്രമം പോലെ
ചില നേരങ്ങളിൽ
പൊടുന്നനെ മുറിയിലേക്ക് കടന്നു
വരാറുണ്ട് കഴിഞ്ഞകാലം
കുറച്ചു നേരം തങ്ങിനിന്ന് കടന്നു
പോകാറുണ്ട്
അകലെയേതോ താഴ് വരയിലേക്ക്,
പർവ്വത പ്രദേശത്തേക്ക്,
ആകാശത്തിലേക്ക് ,ആഴിയിലേക്ക്,
സമയത്തിനുമപ്പുറത്തിനുമപ്പുറത്തേക്ക് !!
നാം കാണാത്ത
ഏതു വഴിയിലൂടെയായിരിക്കും
കഴിഞ്ഞകാലം കടന്നു വരികയും
ചില പരിഭ്രമങ്ങളെ വാരിയിട്ട്
കടന്നുപോവുകയും ചെയ്തിട്ടുണ്ടാവുക