ആളൊഴിഞ്ഞ വീട്ടിൽ
അരിയിട്ടു വാണിരിക്കുന്നു ചിതൽ
ആസനത്തിൽ അമ്ലഭരണിയുമായ്
പുറന്തളത്തിൽ ഉലാത്തുന്നു എറുമ്പുകൾ
ചുമരിൽ നിന്ന് ചുമരിലേക്ക്
ചൂണ്ടയിട്ട് ചടഞ്ഞിരിക്കുന്നു
ചിലന്തികൾ
തൊടികളിൽ തൊണ്ട വീർപ്പിച്ച്
പ്രാകുന്നു
കുറേ പേക്കാച്ചികൾ
എലികളുടെ എഴുത്ത് ശാലയിൽ
അട്ടാചൊട്ടയും,കണ്ണാരം പൊത്തിയും
പല്ലികളുടെ ഇല്ലത്ത്
ഇല്ലത്തമ്മയെപ്പൊലെ
ചുരുണ്ട് കിടക്കുന്നു ഒരു പോങ്ങാൻ -
പൂച്ച
പാതിവെന്ത ചിരിയുമായി
ചാരം മൂടിക്കിടക്കുന്നു
ഒരു മുക്കണ്ണനടുപ്പ്
അടുപ്പ് മൂലയിൽ കാത്തിരിക്കുന്നു
ആളിക്കത്തുന്ന പ്രതീക്ഷയുമായ്
ഒരു ചിമ്മിനി വിളക്ക്
പഴയൊരു വീടെങ്കിലും
പൊളിഞ്ഞു വീഴാറായെങ്കിലും
വീടെല്ലാം വീടാണ്
അവസാനത്തെ അഭയമാണ്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ