മുക്കുറ്റിപ്പൂവ്

സുന്ദരിപ്പൂവേയെൻ കൊച്ചുപൂവേ
മുറ്റത്തിറമ്പിലെ മുക്കുറ്റിപ്പൂവേ
വാരുറ്റ പൂക്കളെ പോലെനീയും
ചേലിലൊന്നാടുമോ കുഞ്ഞു പൂവേ

നാണിച്ചു നാണിച്ചു നിന്നിടല്ലേ
നീളെ പരത്തുന്നു നീ സുഗന്ധം
തെന്നൽ തെളിമയാർന്നുണ്ട് നീളെ
പാടിപൊലിപ്പിക്കും നിന്റെ രാഗം

പുള്ളിയുടുപ്പിട്ട പൂമ്പാറ്റകൾ
മധു തേടി മാറിലണയുന്നല്ലോ
ആവോളമമൃതേകി പരിപാലിക്കും
നിൻമനമെത്രയോ ഉന്നതിയിൽ

മുല്ലയും, പിച്ചിയും, ചേമന്തിയും
പിന്നെ പലതരം സൂനങ്ങളും
പൂത്തുലഞ്ഞുള്ളോരി പൂവാടിയിൽ
നാണിക്കവേണ്ടന്റെ കുഞ്ഞു പൂവേ.