സമയം

ഇന്നലെ രാത്രി കൃത്യം പന്ത്രണ്ടേ -
മുപ്പതിനാണ്
വെട്ടിയിട്ട പോലെ നിട്ടാനീളത്തിൽ
മലർന്നടിച്ചു വീണത്
തട്ടിയും, മുട്ടിയും ഉണർത്താനെത്ര
ശ്രമിച്ചതാണ്
പ്രാഥമികമായി ചെയ്യേണ്ടതൊക്കെ ചെയ്തു
ഇപ്പോൾ ഐ.സി.യുവിൽ സ്ഫടികക്കൂട്ടിൽ
ഇടയ്ക്കെങ്ങാനൊരു ശ്വാസമെടുക്കുന്നതല്ലാതെ
മറ്റനക്കമൊന്നുമില്ല
ഡോക്ടർമാരുടെ സംഘം കിണഞ്ഞു പരിശ്രമി-
ക്കുന്നുണ്ട്
ആശങ്കാജനകമെന്നാണ് ജനസംസാരം
മരുന്നിനോട് പ്രതികരിക്കുന്നില്ലെന്ന്
സ്പെഷ്യലിസ്റ്റുകൾ എത്തിയിട്ടുണ്ട്
മസ്തിഷ്ക മരണം നേരത്തേ സംഭവിച്ചെന്ന്
ഹൃദയസ്പന്ദനം ഏതു നിമിഷവും
നിലയ്ക്കാമെന്ന്
ഓപ്പറേഷൻ തീയറ്ററിൽ ഉദ്വേഗത്തിന്റെ -
നിമിഷങ്ങൾ
വെളിയിൽ ലാഭനഷ്ടങ്ങളുടെ -
കണക്കുകൂട്ടലുകൾ
കൂട്ടിയും, കുറച്ചും, ഗുണിച്ചും, ഹരിച്ചും
ജീവിതത്തിന്റെ വിലകണക്കാക്കിയപ്പോൾ
നഷ്ടമെന്ന് ഒരേസ്വരത്തിൽ സ്വന്തക്കാർ
പിന്നെയെല്ലാം പെട്ടെന്നായിരുന്നു
ഏറ്റെടുക്കുവാൻ ആളില്ലാത്തതിനാൽ
അനാഥ ശവമെന്ന് എഴുതിച്ചേർത്ത്
മോർച്ചറിയുടെ മൂലയിൽ തള്ളപ്പെട്ട നിലയിൽ
പൊട്ടിയ ചില്ലുകൾക്കിടയിൽ
ക്ലോക്കിലെ സമയം ചത്തു കിടന്നു.