കടൽ

കടലിനെക്കുറിച്ച്
നിങ്ങൾക്കെന്തറിയാം
അതിൻ്റെ ആഴത്തെക്കുറിച്ച്
പരപ്പിനെക്കുറിച്ച്

ജീവിതം തന്നെയാണ് കടൽ
മുൻകൂട്ടി ഒന്നും നിശ്ചയിക്കാൻ
കഴിയില്ല .
മനുഷ്യ മനസ്സുപോലെയാണ്
കരയിലേക്ക് കയറുന്നതിരകൈകൾ
വലിച്ചിടാനൊ, വാരിപ്പുണരാനൊ
യെന്നറിയില്ല

കടലിലേക്കിറങ്ങുമ്പോൾ
കരയിലെ പുറന്തോട് അഴിച്ചു വെയ്ക്കണം
കടലിലുമുണ്ട് കാട്
അവൻ്റെ അറ്റുപോയ വേരുകൾ
അവിടെ നിന്നായിരിക്കാം തുടങ്ങുന്നത്

കടലിനുമുണ്ട് നിയമങ്ങൾ
അറ്റുപോയ വേരുകൾ
അടങ്ങാത്ത ആഗ്രഹത്തിൽ തൊട്ടെന്നു
കരുതി
നിയമങ്ങൾ തെറ്റിക്കാൻ കഴിയില്ല
കടലത് നമ്മെ പഠിപ്പിക്കുന്നുണ്ട്

കടലിലേക്കിറങ്ങിയാൽ
അവരിൽ ഒരാളാകണം നമ്മൾ
ഒഴുകിപ്പോയ ഓർമ്മകളെ തിരഞ്ഞ്
പലപാടും ഒഴുകേണ്ടതുണ്ട്

കടലെന്നു കരുതി
കടലായ കടലിലെല്ലാം ഇറങ്ങരുത്
നമ്മുടെ കാൽപ്പാദങ്ങൾ പതിപ്പിക്കുവാൻ
പാടില്ലാത്ത കടലുകളുണ്ട്
പരിശുദ്ധമായവ
തൊഴുതു മടങ്ങുക മാത്രം ചെയ്യേണ്ടവ