ആലോചിച്ചാൽ ഒരന്തവുമില്ല
ആലോചിച്ചില്ലേൽ ഒരു കുന്തവുമില്ലെന്ന്
പറഞ്ഞതുപോലെ
ആലോചിച്ചിട്ടുണ്ടോ
ആറ്റിക്കുറുക്കിയെടുത്താൽ
ഒരു ജീവിതമെത്രയുണ്ടെന്ന്
ഒറ്റവാക്കിൽ
ഒരു മൺകുടത്തിൽ
അടങ്ങുന്നതെന്ന് പറയാമോ?!
കണ്ണീരും,കദനങ്ങളും എവിടെയാണ്
രേഖപ്പെടുത്തിയിട്ടുള്ളത്
വിടർന്നസ്നേഹത്തിനും
വിളമ്പിയ മധുരത്തിനും എവിടെ
അടയാളം
ഏകാന്തയ്ക്കും
ഏറ്റ ശരമാരിക്കും
ആര് കൂട്ട്
പറഞ്ഞ വാക്കുകളും
പറയാത്ത ചില മൗനങ്ങളുമല്ലാതെ
ബാക്കിയാകുന്നത് മറ്റെന്ത്
എങ്കിലും,
കാലത്തേയും
ദേശത്തേയുംമറികടന്ന്
ഒരു ഞരമ്പ് ചിലരെ പരസ്പരം
ബന്ധിപ്പിക്കുന്നുണ്ടാകും
എത്രവായിച്ചാലാണ്
ഒരു ജീവിതത്തെപഠിക്കുക
ഒരിക്കലും വെളിപ്പെടുത്താത്ത
എത്രയെത്ര ആഗ്രഹങ്ങൾ,
അനുഭവങ്ങൾ,
നിരാശകൾ, ആസക്തികൾ
മൂടിവെച്ച മുറിവുകൾ
തിടം വെച്ച ഓർമ്മകൾ
ആറ്റിക്കുറുക്കിയെടുത്താൽ
എത്രയുണ്ടാകും ഒരു ജീവിതം
ഒരു മൺകുടത്തിൽ
അടങ്ങുമോ ജീവിതം
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ