പായല്‍പച്ച പടര്‍ന്നകുളത്തിന്റെ
ആകാശആഴത്തിലേക്ക്
അമ്പിളിമാമനിലെ മുയല്‍കുഞ്ഞിനരികിലെ
കനംകുറഞ്ഞ കല്ലെടുത്ത്‌
കൂട്ടുകാരിലേക്ക് വരാന്‍ കയത്തിലേക്ക്.
കാലിനെ വേരാക്കി
കൈകളെ വള്ളി പടര്‍പ്പാക്കി
പ്രണയത്തിന്റെ പച്ചപടര്‍പ്പിലൂടെ
ഏഥന്‍ തോട്ടത്തിലെ മുന്തിരി -
വള്ളികളിലൂടെ
ആലിംഗനത്തിലമര്‍ന്ന
ആദവും,അവ്വയ്ക്കുമരികിലൂടെ
മാബലിയുടെ പാതാള രാജ്യത്തിലൂടെ
ദേവലോകത്തെ ഇന്ദ്രസാമ്രാജ്യത്തിലൂടെ
ചെകിളപൂക്കളില്‍ മുത്തുപതിച്ച
ജലകന്യകമാരുടെ മദിരോത്സവത്തിലൂടെ
മണ്‌മറഞ്ഞ മുത്തച്ഛന്റെ മുതുമുത്തച്ഛന്റെ
മുതു‌മുതു മുത്തച്ഛന്‍ മാരുടെ
കാലനില്ലാകാലത്തിലൂടെ
കെട്ടുപിണഞ്ഞ കവിതകളിലൂടെ
ഗാസയും,ഇറാക്കും ,സൈബീരിയയും
ചുവന്നതെരുവുകളും ,ചേരിപ്രദേശങ്ങളും
ഗോട്സേയും,ഗാന്ധിയും
പേറ്റ്ചോരയില്‍മുങ്ങിമരിച്ച
പെണ്‍ഭ്രൂണങ്ങളും
ഏഴാം കടലും അക്ഷൗഹിണി പടയും കടന്ന്
കല്ലെടുത്ത്‌ കുന്നേറി
ഇരുട്ടുള്ളരാത്രികളില്‍
ആകാശത്തിനും ബ്ഭൂമിക്കുമിടയില്‍
ഉല്‌ക്കയായി മിന്നാമിന്നിയായി
പാറി ...പാറി ...അങ്ങിനെ
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ