എത്ര കരയണം

ഒരുതുള്ളികൂടിവീണാൽ തൂവിപ്പോകുന്ന  സങ്കടക്കടലിനു നടുവിൽ ഞാൻ
മണ്ണാണ് മരണമായി വന്നത്
ജലമാണ് ഉദകക്രീയ ചെയ്തത്
കരച്ചിലുകളുടെ ഉള്ളിലാണിപ്പോൾ മണ്ണ്
വേദനയുടെ മിന്നൽ മാത്രമാണ് അവശേഷി -
ച്ചിരിക്കുന്നത്
ഓരോ മനസ്സും പ്രതീക്ഷയുടെ ഓരോ -
തുരുത്താണ്
കാണാതെപോയവർ ഏതുനിമിഷവും
മണ്ണിനെ,മഴയെ വകഞ്ഞു മാറ്റി തിരിച്ചെത്തു
മെന്ന പ്രതീക്ഷയുടെ.
നഷ്ടങ്ങളുടെ കണക്കാവുന്നു ജീവിതം.
ചിലർ ഒറ്റയ്ക്ക് മൂകമായി
ചിലർ ആൾക്കൂട്ടത്തിൽ തനിയെ
ചിലർ ദുഃസ്വപ്നങ്ങളുടെ ഒറ്റത്തുരുത്തിൽ
എത്ര പെട്ടെന്നാണ് ജീവിതം ചില്ലു ഗ്ലാസ് -
പോലെ ചിതറിപ്പോയത്
എത്ര കരയണം ഇനിയുമീ ജീവിതം