പാവ ജീവിതം

ഇരുണ്ട ജനൽ പാളികളിലൂടെ വന്ന്
ശിശിരം കൊഞ്ഞനം കുത്തുന്നു
മഴക്കാറും ചാറ്റൽ മഴയും കൂട്ടുവരുന്നു
നോക്കു ;
അലങ്കരിച്ചു കഴിയുന്നതുവരെ
ഈ ക്രിസ്മസ് മരം കുട്ടികൾ കാണരുത്
ഇബ്സന്റെ പാവവീട് പോലെ എത്ര
യാഥാർത്ഥ്യം  ജീവിതം
വസന്തം വരും, വർണ്ണങ്ങൾ വിരിയും,
ആനന്ദഭരിതമാകും, പാടും, നൃത്തമാടും
ചിറകിനടിയിൽ തികച്ചും സുരക്ഷിതമാ-
യിരിക്കും
എത്ര മനോഹരം
ആശകൊണ്ടൊരു ജീവിതം
കഴിയില്ല ഇനിയുമീപാവ ജീവിതം
കളി വീട്ടിലെ കുഞ്ഞു കിളിയുടേതു പോലുള്ള
ദിനചര്യ
പാവക്കുഞ്ഞിനെയെന്നോണമുള്ള
ഈ തട്ടിക്കളി
അച്ഛനും, അമ്മയും, ഭർത്താവും, -
കുട്ടികളും
തട്ടിക്കളിക്കുന്നൊരീക്കളി
വയ്യ ഇനിയുമീ കഴമ്പില്ലാക്കളി
കുമ്പിളിലെങ്കിലും ഈ ജീവജലം
ഇറ്റിറ്റു വീണ് വറ്റി തീരുന്നില്ലല്ലോ .
.......
കുറിപ്പ് :- ഇബ്സന്റ പാവ വീട് വായിച്ചപ്പോൾ
തോന്നിയത്