പ്രണയോർമ്മ

ദൂരെയാണെങ്കിലും ചാരെയിരുന്നു ഞാൻ
ചികയുന്നു ചാരുതയാർന്ന സ്മരണകൾ
നാട്ടുവഴിയിലൂടൊട്ടു നാണത്താലെ
നോട്ടമെറിഞ്ഞു നടന്നു നീ പോയതും

തുമ്പക്കുടങ്ങളിലിമ്പംകലർന്നുള്ള
പൂത്തുമ്പിയായി നീ പാറിപ്പറന്നതും
വർഷമേഘത്തിന്റെ ഹർഷമായ് ചാറുന്ന
ചിരിതൻ മഴയിൽനീ,യെന്നേ നനച്ചതും

ഹരിനീലവർണ്ണപ്പാവാടയും ചുറ്റി നീ
കാലത്തിളം തെന്നലോളങ്ങൾ തീർത്തതും
ഹരിണമിഴിനീട്ടി കതിർമുടിത്തുമ്പാട്ടി
ചേലിലെന്നുള്ളത്തിൽ കവിത വിരിച്ചതും

ഏറ്റുമീൻ കേറിയെന്നാർത്തുല്ലസിച്ചന്ന്
കൂട്ടുകാരൊത്തുഞാൻ വന്നുനിൽക്കേ
ചാരുത കരകവിഞ്ഞൊഴുകുന്ന ശില്പംപോൽ
തോട്ടുവക്കത്തു നീ നിന്നതില്ലേ

അകലത്തകലത്തു കാലം മറയിലും
അരികത്തരികത്തീയോർമ്മയിന്നും
ചെമ്മൺ വഴിയിലെ കാലടിപ്പാടുകൾ
ചിട്ടയായിന്നുമീ നെഞ്ചകത്തിൽ