ഒപ്പീസ്

പന്നകത്തിൽ പെരുച്ചാഴി
മുങ്ങിക്കൊണ്ടിരിക്കുന്നു വള്ളം
വെളുത്തു പോയിജന്മം
വേരറ്റ പാഴ്ത്തടി

ലഹരിയുടെ കഴുകൻ
പ്രാചീരം കടന്ന് കൊത്തിവലിക്കുന്നു -
ഹൃദയവും, കരളും
കരളുവാൻ ഇനിയെന്തുണ്ട് ബാക്കി
കത്തിക്കരിഞ്ഞ കുറ്റി

കാമത്തിൻ്റെ കന്മദമല്ല കണ്ണിൽ
കാകോളത്തിൻ്റെ ലഹരി
സ്പർദ്ധയുടെ പർദ്ദയാണ് ചുറ്റും
കാളകൂട മുഖങ്ങൾ

വീര്യത്തിന് കുഴിച്ചിട്ട വീഞ്ഞാണ് -
ഓർമ്മ
കർമ്മങ്ങളുടെ കാലം കഴിഞ്ഞു
എന്നേ ഒപ്പീസ്ചൊല്ലപ്പെട്ട ശവം
...................
കുറിപ്പ്
1 ഒപ്പീസ് =ശവം അടക്കാന്‍ കൊണ്ടുപോകുമ്പോള്‍ റോമന്‍ കത്തോലിക്കര്‍ പാടുന്ന ഗീതങ്ങള്‍
2 പന്നകം =വള്ളത്തിന്‍റെ മൂടി
3 പ്രാചീരം =ഉരസ്സിനെയും വയറിനെയും വേര്‍തിരിച്ചുകൊണ്ട് ഉള്ളില്‍ സ്ഥിതിചെയ്യുന്ന സ്തരം