എങ്ങനെ

ആദ്യചുംബനത്തിൻ്റെ
അടയാളം
ഇന്നും മാഞ്ഞിട്ടില്ല
പ്രേമത്തിൻ്റെ മുഖമൂടി
മാറ്റിയിട്ടും

നീറിനിൽക്കും
നഖമുനപ്പാടുമാറാൻ
ഒരു ജന്മം തന്നെ മതിയാകില്ല

നീറും വ്യഥയുടെ
മൂർദ്ധാവിൽ ചുംബിക്കാൻ
നിശീഥ കരങ്ങളും അരികില -
ണഞ്ഞില്ല

മറക്കുവാനെളുതല്ല
സത്യമുള്ളിൽ ലാവയായ്
തിളച്ചു നിൽക്കുന്നു

ഇത്രയും കരയുന്നുഞാനെങ്കിൽ
എത്രമാത്രം കരഞ്ഞിടുന്നുണ്ടവൻ
പരിത്യജിക്കുവാനെളുപ്പമത്രേ
പരിണയിക്കുവാനില്ല മാർഗം

ആദ്യ ചുംബനത്താലെ -
അന്നെൻ്റെ
ആത്മനൊമ്പരപ്പാട് മായ്ച്ചോനെ
ഏതു ശിശിര രാവിൻ്റെ കത്തിയാൽ
കീറിയെറിയുമീ ശരീരവസത്രം ഞാൻ.