എങ്ങായാലും, എന്നായാലും

പ്രിയപ്പെട്ടവളേ,
നിന്നെക്കുറിച്ചുള്ള ഓർമ്മകൾ
മൾബെറി പഴംപോലെ,
മായ്ക്കാനാവാത്ത സ്പന്ദനംപോലെ

മരിക്കാതിരിക്കുന്ന നിത്യസ്മരണ
യാകും നീ
പ്രിയേ,
കാലത്തിൻ്റെ ഏതോ കരയിലിരുന്ന്
ഓർക്കുന്നുണ്ടാവില്ലെ നീയു,മാദിനങ്ങൾ

ഓരോ ഓർമ്മയിലും നാം ആദ്യംകണ്ട -
പ്രായത്തിലേക്കും ,സാഹചര്യത്തിലേക്കും
നടന്നെത്തുന്നില്ലെ
ഇഷ്ട കവിതയുടെ ആദ്യവരിയുടെ വായന
പോലെ
ബാക്കിക്കൂടി വായിച്ചു തീർക്കാതെ മടക്കി
വെയ്ക്കാൻ കഴിയാത്തപോലെ
ഓർമ്മകൾക്കു മുന്നിൽ തരിച്ചിരുന്നു പോകു
ന്നില്ലെ

സ്വപ്നങ്ങൾ അരിച്ചരിച്ചു നീങ്ങുന്ന
സുഷിരമുണ്ടാ മിഴികളിലെന്നു ഞാൻ
അധരത്തിലെ മധുരം നുകരാനെത്തവേ
കാണാവലയിൽ കുടുങ്ങിയ,യിളംനീല
ശലഭമാമിഴികളെന്നു നീ

ഇന്നുമാ മൾബെറിച്ചെടിയുടെയിലകൾ
നിർഭയമായി വന്നു തൊടുന്നുണ്ടെന്നെ
പ്രിയപ്പെട്ടവളേ,
നിറയെ സ്വപ്നങ്ങൾനെയ്യുന്ന
പട്ടുനൂൽപുഴുക്കളാണ് പ്രണയം