ദുഃഖിയുടെ വാക്കുകൾക്ക്
വേവുന്ന മാംസത്തിൻ്റെ ചൂടും,
ഗന്ധവുമാണ്
അവരിലുണ്ട് കിളന്നു നിൽക്കുന്ന
കത്തുന്നസ്മരണകൾ
ഹൃദയ ഭിത്തിയിൽ തൂക്കപ്പെട്ട
സ്നേഹ അടയാളങ്ങൾ
നഷ്ടപ്പെട്ട വെള്ളാരങ്കല്ലുകൾ
അവരുടെ പ്രഭാതത്തിനും, അപരാഹ്ന -
ത്തിനും
മൃതരാത്രിയുടെ നിറവും, തണുപ്പും
മൗനത്തിൻ്റെ മഹാരുചി നുണഞ്ഞ്
ഉള്ളിൽ ഉറവയിട്ട് ഉള്ളിലൊഴുകുന്ന -
ഒരു പുഴയാണവർ
അലിവിൻ്റെ മർമ്മരങ്ങൾ തേങ്ങലായ്
ഉണരുന്നു
ഉള്ളനക്കത്തിൻ്റെ നീലിമ കണ്ണീരായ് -
പൊഴിയുന്നു
കാലത്തിൻ്റെ കനപ്പായിരിക്കാം
മറവിയുടെ കുപ്പായം
ഓരോ അനുഭവവും ഉള്ളുണർവുകളാണ് .
ദുഃഖികൾ നമുക്ക് പറഞ്ഞു തരുന്ന ഒന്നുണ്ട്
സങ്കടത്തിരകൾ മാത്രമുള്ള
ഒന്നുമില്ലാത്ത ഒന്നാണ് ജീവിതമെന്ന്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ