ഏതോപുരാതന ലിഖിതംപോലെ
അയാൾ ചുരുണ്ടുകൂടിക്കിടന്നു
പീളകെട്ടിയ നേർത്തമഞ്ഞവെളിച്ചം
അകത്ത് നിറഞ്ഞിരുന്നു
പ്രാചീനമായ നേരിയദുർഗന്ധം
എങ്ങും വ്യാപിച്ചിരുന്നു
ശരീരത്തിൽ നിന്നും ശവത്തിലേക്കുള്ള
വളർച്ചയായിരിക്കാം
ദുർവ്വഹമായ ഒരേകാന്തത മൂടിനിൽ -
ക്കുന്നു
ചില നേരങ്ങളിൽ ചൂണ്ടയിൽ കുടുങ്ങിയ -
മീനിനെപ്പോലെ
ഒരു കുതിപ്പും ആഞ്ഞു വലിയും
കുതറുന്ന പിടച്ചിലും
പിന്നെ ശവംപോലെ അനക്കമറ്റ കിടപ്പ്
ജീവൻ്റെ വടംവലിയായിരിക്കാം!
ആയുസ്സിൻ്റെ ഏതറ്റം വരേയും തെല്ലും
മായാതെ കിടക്കുന്ന
ചില ഓർമ്മകളായിരിക്കാം !!
കൈകാലുകൾ പിണഞ്ഞു കിടക്കുന്ന
മണ്ണിരകളെപ്പോലെ
വലുപ്പമാർന്ന പച്ചഞരമ്പുകൾ
മെലിഞ്ഞ നദിപോലെ
അതെ,
ഒരിക്കൽ ഒരുകടൽ തന്നെയായിരി-
ക്കണം
ഇന്ന്,
കടലൊഴിഞ്ഞതിൻ ബാക്കിയും
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ