മുകുന്ദേട്ടന്റെ പുറപ്പെട്ട് പോക്ക്

ഉറുമ്പുകൾ പണിത പാതയിൽ
പാറ്റയുടെ ശവഘോഷ യാത്ര -
നോക്കിയിയിരിക്കുന്നു അയാൾ
ബുദ്ധി മൂക്കാത്ത മുകുന്ദേട്ടൻ.
മണലെഴുത്താണ് പണി
മണിയനീച്ചകളുമായി
ഒളിച്ചും പൊത്തും കളികൾ.
പുറപ്പെട്ടു പോകാൻ തുടങ്ങിയപ്പോഴാണ്
കാലുകളെ ചങ്ങല്യ്ക്കിട്ടത്‌
അകത്തളത്തിൽ ആനയായി
മുട്ടിലിഴയും മുകുന്ദേട്ടൻ
വയസ്സ് കൂടുന്തോറും
വെളിവ് കൂടി ക്കൂടിവന്നു മുകുന്ദേട്ടനു
പുറത്തേക്ക് ഇറങ്ങുമ്പോൾ
കൂട്ടിനു കൈയ്യിൽ ചങ്ങലയും
പുറപ്പെട്ടു പോകുവാൻ തോന്നുമ്പോൾ -
മുകുന്ദേട്ടനെ ചങ്ങലയ്ക്കിടും മുകുന്ദേട്ടൻ
മുകുന്ദേട്ടനെ കാണുമ്പോൾ ഇന്നും
പുറപ്പെട്ടു പോകാറുണ്ട് എന്റെ മനസ്സ്
കഴിഞ്ഞു പോയ കുഞ്ഞു നാളിലേക്ക്