നിലവിളി

നെടുനീളത്തിൽ വീണ
ഒരു നിലവിളിയെ
താങ്ങിയെടുത്ത് കിടത്തുന്നു -
വരാന്തയിൽ
മരിച്ചവനിൽ നിന്നും വളരെയകലെ
വായുസഞ്ചാര,മധികമുള്ളിടത്ത്
കൂട്ടംകൂടി നിന്നവരെല്ലാം അകന്നു -
മാറുന്നു
അർദ്ധബോധത്തിലും അലമുറയിടുന്നു-
നിലവിളി
മരിച്ചവന്റെ അരികിലെത്താൻ വഴി -
യന്വേഷിക്കുന്നു
മോർച്ചറിയിൽ,
ചിതയിൽ,
കല്ലറകളിൽ
റെയിപ്പാളത്തിൽ
മരക്കൊമ്പിൽ,നിന്നെല്ലാം പിടിച്ചിറക്കി -
നിലവിളിയെ
അന്വേഷിച്ച വഴികളെല്ലാം അടഞ്ഞപ്പോൾ
ജലപാനമുപേക്ഷിച്ചു നിലവിളി.
ഇപ്പോൾ,
മരണംകാത്തുകിടന്ന നിലവിളി
ജീവിതംകാത്തു കിടക്കുന്നു
ആശുപത്രിയിൽ