അത്മഹത്യാക്കുറിപ്പ്

എല്ലാ കുറിപ്പുകളും പോലെയല്ല
ആത്മഹത്യാക്കുറിപ്പുകൾ
കറുപ്പിന്റെ അടയാളമാണത്
കുറിക്ക് കൊള്ളുന്നതും.

മറുപടിക്ക് കാത്തുനിൽക്കാത്ത -
എഴുത്തുകളാണ്
ആത്മഹത്യാക്കുറിപ്പുകൾ.

ചലനമറ്റതെന്നു തോന്നാം
ജ്വലിച്ചുയർന്നിടാം ചിലപ്പോൾ
ചെയ്യുന്ന ( ചെയ്യിക്കുന്ന)പാതകത്തിന്
ചമയ്ക്കുന്ന ന്യായീകരണം

ശവപ്പറമ്പു പോലുള്ള കടലാസിൽ
മൺകൂനകളും, മീസാൻ കല്ലുകളും
പോലെ അക്ഷരങ്ങൾ
മരണത്തിന്റെ നിയമം കൊണ്ട്
ജന്മദിനത്തെ റദ്ദ് ചെയ്യൽ
സന്തോഷത്തിന്റെ ഒരു കീറാകാശത്തിലേക്ക്
അമാവാസിയുടെ കടന്നുകയറ്റം.

ആത്മഹത്യ ചെയ്യുന്നവരെല്ലാം
കുറിപ്പുകളെഴുതി വെയ്ക്കാറില്ല
ജീവിച്ചിരിക്കുന്നവരോടൊന്നും പറയാ-
നില്ലാത്തതുകൊണ്ടായിരിക്കില്ല
മരിച്ചവരാണിനികൂട്ട് എന്നതുകൊണ്ടാകാം