അപ്പനെ ഓർക്കുമ്പോൾ

അപ്പനെ അടക്കം ചെയ്തിടത്ത്
ഒരു പച്ചപ്പ്മുളയിടുന്നു
അപ്പൻ്റെ ഒരു തുള്ളി ഉപ്പ്
അതിൽ ഉണ്ടായേക്കാം

അപ്പനെന്നും താങ്ങും തണലുമായിരുന്നു
ഈ പച്ചപ്പിലൂടെ ജീവിതം
പച്ച പിടിപ്പിക്കേണ്ടതിനെക്കുറിച്ച് ഓർമ്മി-
പ്പിക്കുകയാകാം
പച്ച തൊടാതെ പോയ ഒരു ജീവിതമായിരു-
ന്നല്ലോ അപ്പൻ്റേത് !

വേവുകാലം മാറുന്നേയില്ല
എനിക്ക് എന്നിലേക്ക് തിരിച്ചു പോകാൻ
കഴിയുന്നില്ല
കരയിലകപ്പെട്ട മത്സ്യം പോലെ പിടയുന്നു -
ഉള്ളം

ഈ പച്ചപ്പെന്നെ അപ്പൻ്റെ വിരലുകൾ പോലെ
കിക്കിളിപ്പെടുത്തുന്നുണ്ട്
ഓർമ്മകളുടെ നനുത്ത തൂവലിനൊപ്പം
വേദനയുടെ കൊടുംവേനലും കാണിച്ചുതരുന്നുണ്ട്

ഞാൻ;
ഉത്തരം കിട്ടാത്ത ചോദ്യം
കൊഴിഞ്ഞു വീണ ഒരില
തെറ്റിയോടുന്ന സമയസൂചി
തൊട്ടു വിളിക്കുന്നുണ്ട് പച്ചപ്പ്
അപ്പനെന്നും ഒപ്പരമുണ്ടെന്ന് പറയുന്നതാകാം