കാണാതിരുന്നാൽ

ഇരുന്നാൽ

ഇരിപ്പുറയ്ക്കുന്നില്ല

കിടന്നാൽ

കണ്ണടയുന്നില്ല

നിൽക്കക്കള്ളിയില്ലാതായ-

പ്പോഴാണ്

അവൻ അവളെ തിരഞ്ഞി-

റങ്ങിയത്

ആദ്യം പോയത്

അവർ എന്നും കണ്ടുമുട്ടുന്ന

ബസ് സ്റ്റോപ്പിലായിരുന്നു

ചില പച്ചത്തലപ്പുകൾ

അർത്ഥംവച്ചു തലയാട്ടിയ -

തല്ലാതെ 

അവളെ അവിടെയെങ്ങും 

കണ്ടില്ല

പിന്നെ പോയത് പുസ്തക -

കടയിൽ

ചില അക്ഷരക്കണ്ണുകൾ

അർത്ഥം തിരഞ്ഞ് ചിരിച്ചതല്ലാതെ

അവളില്ല

ഇനിയും എവിടെ തിരയും

ഒറ്റക്കണ്ണിട്ട് ഒളിഞ്ഞു നോക്കുന്നു

അസ്വസ്ഥത

അപ്പോഴാണ് അവൻ അവൻ്റെ

മനസ്സിലേക്കൊന്നെത്തി നോക്കിയത്

ദേ, ഇരുന്ന് ചിരിക്കുന്നു

പറ്റിച്ചേയെന്ന്