ഒറ്റമരം

മനസ്സിൽ മധുരമുള്ള ചായങ്ങളാൽ
വരച്ചു വെച്ചിട്ടുണ്ട് ഞാൻ നിന്നെ
നിൻ്റെ ചില്ലകൾക്കും എന്നെപ്പോലെ
ഗ്രീഷ്മത്തിൻ്റെ ചുവപ്പു നിറം

ഉണങ്ങുമെന്നു തോന്നിയ ഇല -
തളിരിടുന്നു
നിൻ്റെ കണ്ണിൽ ഞാനെന്നെ കാണുന്നു
എന്തെന്ന് പറയാനറിയാത്ത ഒരുമ്മ
നീയെൻ്റെ ഹൃദയത്തിൽ തൊട്ടു വെയ്ക്കുന്നു

പരസ്പരം നമ്മുടെ ഞരമ്പിലേക്ക് ഗ്രീഷ്മം
ഒഴുകി പരക്കുന്നു
മണ്ണിലെന്ന പോലെ അവ നമ്മിൽ വേരാഴ്ത്തി
വേർപെട്ടു പോകാനാവാത്ത വിധത്തിൽ
ചേർത്തുനിർത്തുന്നു
അലിഞ്ഞു ചേർന്നൊന്നായ നാം ഒറ്റമരമായി
ചൂടും കുളിരുമായ് ചോർന്നൊലിക്കുന്നു