രാവിലെ നോക്കുമ്പോൾ
മാഞ്ചോട്ടിൽ ഇലകളടിഞ്ഞിരിക്കുന്നു
പത്രത്താളിലെ ചോരയുടെ നിറം
കട്ടൻ ചായയ്ക്ക്
മീൻകാരൻ തന്നത് അഞ്ച് മത്തി
ചീർത്തുവയറു പൊട്ടിയിട്ടും ഗന്ധ-
മില്ലാത്തത് !
പൂച്ചയ്ക്ക് പരിചയമില്ല മീനും മീൻ -
കാരനും !
മൂക്കാത്ത ചക്ക തൂങ്ങി നിൽക്കുന്നു
ഗർഭിണിയായ അവിവാഹിത
പ്ലാക്കൊമ്പിൽ തൂങ്ങിയതുപോലെ
ചുള്ളിക്കമ്പു പരതി പരക്കെ നടക്കുന്നു
ഒരു കാക്ക
കാലം കടന്നു പോകുന്നു
കാഴ്ചകൾ മാറി വരുന്നു
മഞ്ഞച്ചു പോയി മനസ്സ്
നരച്ച ദിനങ്ങൾ മുന്നിൽ
പ്രാതലായെന്ന് സമയവിളി
പ്രാക്കുകളുടെ പത്രം മാറ്റി വെച്ച്
ഇല കൊഴിഞ്ഞ ഒരു മരം
പതുക്കെയെഴുന്നേറ്റു
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ