ഓർമ്മയ്ക്ക്

കൂട്ടുകാർ കടന്നു പോകവേ
ഹന്ത! ചിന്തിച്ചിരിക്കുവതെന്തു നീ
ഓർത്തിരുന്നിട്ടു കാര്യമില്ലെടോ
കാലം പാർത്തു വെച്ചതാണെല്ലാം

യൗവ്വന മദിര കുടിച്ചു നാം
മദിച്ചു നടന്നൊരാക്കാലം
തൃഷ്ണകൾ കൃഷ്ണമണികളെ
ഉജ്ജ്വലിപ്പിച്ച നാളുകൾ

പാട്ടുപാടി രസിച്ചും പരസ്പരം
കലഹിച്ചും
തെല്ലിട കഴിഞ്ഞു പിന്നെ ഫുല്ല ഭാവം പകർന്നും
അല്ലും പകലുമില്ലാതെ,യല്ലലിൽ
ഒന്നായ്ക്കഴിഞ്ഞതും
ജീവിത സ്പന്ദങ്ങളോരോന്നും
ഒന്നെന്നപോലേറ്റി നടന്നതും

പിന്നെ പലപാടുപോയെങ്കിലും
പങ്കപ്പാടിലായിപ്പോയെങ്കിലും
ജീവിത വഞ്ചിതൻ പങ്കായം നീറ്റിൽ
നിന്നെടുക്കാൻ നേരമില്ലാതെ -
പോയെങ്കിലും
ഓർമ്മതൻ തിരുമുറ്റത്ത് ഓടിച്ചാടി
കളിച്ചിരുന്നു

ഒന്നാണെന്നു നാമോർക്കിലും
ഒറ്റയൊറ്റയാണെടോ
 "കൂടിയല്ലാ പിറക്കുന്ന നേരത്തും, കൂടിയല്ലാ മരിക്കുന്ന നേരത്തും "
ഓർത്തുവെച്ചിടാം നമുക്കുള്ളിലൊ,-
രോളത്തിനായെങ്കിലും