എൻ്റെ വിരലോടുചേർന്നാണ്
അച്ഛൻ്റെ വിരലുമുറുക്കിയിരുന്നത്
ഇലകൊഴിയുന്ന ലാഘവത്തോടെ
ഏതോനിമിഷത്തിലതയഞ്ഞു
ക്ഷണിക്കപ്പെടാത്ത അതിഥിയാണ് -
മരണം
ചിലപ്പോൾ, പക്ഷിക്കുഞ്ഞിൻ്റെ ശാന്ത -
തയോടെവരും
മറ്റുപലപ്പോഴും മീൻകൊത്തിയുടെ -
പാടവത്തോടേയും
അപ്പോൾ,
പ്രകാശത്തിൽനിന്ന് പൊടുന്നനെ -
ഇരുട്ടിലകപ്പെട്ടപോലെ
ആകാംക്ഷനിറഞ്ഞ ഒരുകഥയുടെ -
അവസാനവാക്യം പറയാൻ മറന്നു -
പോയപോലെ
ഉറക്കത്തിൻ്റേയും ഉണർവ്വിൻ്റേയും
അതിർരേഖയിലെന്നപോലെ
ഏതോഒരു കുരുക്കിൽപ്പെട്ട നാക്കി -
നെപ്പോലെ
സ്നേഹത്തിൻ്റെ ഒരുകടൽ നീങ്ങി -
പ്പോയതുപോലെ
ഒറ്റക്കൊമ്പിലുടക്കിയ ഒരപ്പൂപ്പൻതാടി -
യാണു ഞാൻ
ചേർത്തുനിർത്തുവാൻ ഇല്ലശാഖകൾ
കാറ്റുപാറുംവഴിയെ ഇനിയെൻ്റെയാനം
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ