സാധാരണ ഒരു ദിവസം

രാവിലെ ഉണർന്നെണീറ്റുകഴിഞ്ഞാൽ

എല്ലാവരും എന്തൊക്കെയോ മറന്നു -

വെച്ചപോലെ തിരക്കിട്ട് തിരയുന്നു

തിടംവെച്ച മറവിയിലേക്ക് ഇറങ്ങിനട -

ക്കുന്നു

തളർന്നുറങ്ങുന്നഅടുക്കളയെ തട്ടി-

യുണർത്തി

തിണർത്ത ഓർമകളെ മുളപ്പിക്കുന്നു

മറന്നുവെച്ചതുപോലെ

സമയത്തിനുമുന്നേഓടി ഓരോന്നു -

ചെയ്തുകൊണ്ടിരിക്കുന്നു

അടുക്കളയിൽ എരിവായ് ,പുളിയായ്

കടുകായ്,കയ്ക്കലയായ് .......

നനക്കല്ലിൽ വിഴുപ്പായ്

തെരുവിൽ ചിറകില്ലാ പക്ഷിയായ്

ചിലർ വെളിച്ചത്തിൻ്റെ തൊലിപൊളിച്ച്

വെള്ളകീറുമ്പോൾ മൈലുകൾക്കപ്പുറം

ചിലർ കാൽകഴച്ചിട്ടും ശരീരംതളർന്നിട്ടും 

ഇരിക്കാൻ മറന്നതുപോലെ നിന്നുതന്നെ

മറ്റൊരുകൂട്ടർ അരയ്ക്കുതാഴെകാലുള്ള -

തുതന്നെ മറന്നപോലെ ഇരുന്ന്തന്നെ

മറ്റുചിലർ ഉന്തിയും ,തള്ളിയും,

കരഞ്ഞും കണ്ണീർ ചൊരിഞ്ഞും

വിയർത്തും വിശന്നും.....

സന്ധ്യയിരുട്ടുമ്പോൾ രാവിലെപ്പോയ

പക്ഷികളെപ്പോലെ .

എല്ലാവരും മറന്നുവെച്ചവീടിനെ തിരിച്ചു -

കിട്ടിയതുപോലെ

തിരക്കിട്ട് തിടംവെച്ചഓർമയിലേക്ക്

ഇറങ്ങി നടക്കുന്നു