അത്താഴം കഴിഞ്ഞ്
അവസാനത്തെ സീരിയലും കഴിഞ്ഞ്
അവൾ കിടന്നു
അസ്വസ്ഥതയുടെ
ഒരു ബീഡിപ്പുകയിലിരിക്കുമ്പോഴാണ്
കവിസുഹൃത്ത് വന്നത്
കുളിച്ചീറൻ മാറ്റി
അലച്ചലിൻ്റെ ഉലച്ചലുമാറ്റാൻ
രണ്ടെണ്ണം വീശി
ഒരു കവിതയും തൊട്ടുകൂട്ടി
അവസാനത്തെ വറ്റും, വാക്കും
നുള്ളിക്കൊറിച്ച്
അവനും കിടന്നു
കട്ടൻ തണുത്താറിയിട്ടും
നേരം നന്നേ വെളുത്തിട്ടും
എഴുന്നേറ്റു വരാത്തതുകൊണ്ടാണ്
അകത്തേക്ക് കയറി നോക്കിയത്
കട്ടിലിൽ
മുഷിഞ്ഞു തുടങ്ങിയ
അരപ്പായ കടലാസിൽ
ചുരുണ്ടുകൂടി ഉറങ്ങുന്നു
ഒരു കവിത
അപ്പോഴാണറിഞ്ഞത്
രൂപാന്തര പ്രാപ്തിവന്ന
ഒരു കവിതയായിരുന്നു
അവനെന്ന്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ