മരിച്ചവർക്കായി

കർമ്മം ചെയ്യുന്നതിൽ കാര്യമെന്ത്
കുടമുടച്ചതേ നഷ്ടം!
അവശതയിൽ അടുത്തിരുന്ന്
അൽപം അന്നംനൽകി
ആശ്വസിപ്പിച്ചിരുന്നെങ്കിൽ
അണയില്ലായിരുന്നു
ആളിക്കത്തിയിരുന്ന
നമ്മേ ആളാക്കിയിരുന്ന
അരജീവൻ.

കരിയിലമാറ്റി കുളിരകറ്റി
കരിയുന്ന വേരിലേക്ക്
ചുടുവെള്ളമൊഴിച്ചു.

തിരകളെണ്ണുന്നവൻ നീ
കൈ നനയാതെ മീൻ പിടിക്കുന്നവൻ
അഭയം നൽകേണ്ടവനെ
ഉപായത്തിലൂടെ അപകടത്തിലാക്കുന്നവൻ.

മൃതിയുടെ കൊടി
സ്മൃതിയുടെ രുധിര വാഴ്ച
പാഞ്ഞു വരുന്നൊരമ്പ്.

കർമ്മങ്ങൾ ചെയ്ത്
കുടത്തിലടച്ച്
ഒഴുക്കിക്കളയുന്നു നീ നിന്റെ
പാപങ്ങളെ
ആശ്വസിക്കാം നിനക്ക്
മരിച്ചവരാരും
കണക്കു പറഞ്ഞ് വന്നിട്ടില്ല
ഇന്നേവരെ.