അധികാരം

വിഷാദിച്ചിരിക്കുന്നു
ഒരു നിഷാദൻ
അമ്പ് തൊടുക്കുമ്പോൾ
പാമ്പായ് കൊത്തുന്നു ഓർമ്മ
കഴിഞ്ഞു പോയൊരാകുലത്തിൽ
കണ്ണിയായതിൻ ശിക്ഷ
കൽപനവരും മുമ്പേ
കഴുത്തെടുക്കണമെനിക്ക്
ഖഡ്ഗത്തിന് കാഴ്ചവെക്കില്ല
കുനിഞ്ഞ ശിരസ്സ്.
കറുപ്പാണ് കൊടിയടയാളം
കാരാഗൃഹമാണ് വീട്
ചാമരവും, ഛത്രവുമുള്ളവന്
ചിത്രവധം ചെയ്യാൻ എന്തെളുപ്പം
ബുദ്ധവൃക്ഷത്തെയാണ്
വൃദ്ധ വൃക്ഷമെന്ന് പറഞ്ഞ് -
മുറിച്ചു മാറ്റിയത്
കാൽവരിയിലൂടെയാണ് യാത്ര
കാലിൽ തടയുന്നു കുരിശ്
ഗാത്രം നോക്കിയിരിപ്പുണ്ട് ഗൃധ്രം
പ്രാണൻ പിടയുന്നുണ്ട് കുരിശിൽ
പാമ്പേ, നീ തന്നെയാണ് ശരി
അപരാധത്തിലേ ആഴ്ന്നിരുന്നുള്ളു
നിന്റെ ഗരം