കവിത എഴുതിയാൽ

കലാപമിപ്പോൾ
കരളിലാണ് നടക്കുന്നത്.
എങ്ങിനെയെഴുതുംകവിത?
കൈ, കാല്, കണ്ണ്, ഉടല്
ഏതാകും ആദ്യം!
അക്ഷരങ്ങളെ ചേർത്തു വെച്ചൊരാ
വാക്കിൻവാൾ വന്നെടുക്കുക.

വന്നുണർത്തുമോർമ്മയൊക്കെയും
അമർത്തി വെയ്ക്കുവാൻ വയ്യ
ഞെരിച്ചു കൊല്ലുവാൻ പാർത്തു നിൽക്കുന്ന
കാഴ്ച്ച കടങ്ങൾ പോക്കുന്നു

സന്ധ്യ തൊട്ട സിന്ദൂരമെല്ലാം കറുത്ത് -
രക്തമാകുന്നു
വരണ്ട ദേഹങ്ങൾ
വിണ്ട ചുണ്ടുകൾ
അറ്റ ശലഭച്ചിറകുകൾ

മതി, മതി, ആർത്തുപെയ്യുവാൻ
ആഞ്ഞു നിൽക്കുന്ന സ്മൃതികളെ
കെട്ടവേളയിതെങ്കിലും, ഞാൻ കൊഴി-
ഞ്ഞു വീഴുമെങ്കിലും
എഴുതാതിരിക്കുവാൻവയ്യ
കവിതയെ
പുൽകാതിരിക്കുവാൻ വയ്യ.