ആയുസ്സ്

കെട്ടുപിണഞ്ഞ
കൈരേഖ നോക്കി
കാക്കാലത്തി പറഞ്ഞു:
ഇത്, മരിച്ചവന്റെ കൈപ്പത്തി.
ആയുർരേഖ വെട്ടപ്പെട്ടവന്റെ
ആയുരാരോഗ്യത്തിലേക്ക്
അസ്ത്രം പോലൊരു വാക്ക് .
മുറിഞ്ഞുപോയ രേഖകളിൽ
തളിർത്തു നിൽക്കുന്നു ജീവിതം.
രേഖകളില്ലാത്ത
രാഗത്തിന്നൊരടയാളം
ജീവിതത്തിന്റെ കലക്കു വെള്ളത്തിൽ
ജാതകമൊഴുക്കിയവൻ
വഴിത്താരയിൽ
വിലാസം വലിച്ചെറിഞ്ഞവൻ
അത്ഭുതങ്ങൾ
അരികിലെന്ന്
അതിശയം കൂറുന്നവർക്ക്
ഒരുമുറിപുഞ്ചിരി അറുത്തു കൊടുത്തവൻ
കിനാവില്ലാതെ
കണ്ണീരു മാത്രംതന്ന
കാലത്തിന്റെ കരണക്കുറ്റിക്ക്
കാറിത്തുപ്പി കണക്കു പറഞ്ഞവൻ.
അടുത്തക്ഷണം;
ആയുസ്സില്ലെന്ന്
അച്ചട്ടം പറഞ്ഞ
കാക്കാലത്തി
മരിച്ചുവീണു.