ചില യാത്രകൾ

വിശപ്പ്
രോഗം
പ്രണയം
മരണം
ചില യാത്രകളുണ്ട്
ഒറ്റയ്ക്ക് പുറപ്പെടേണ്ടവ.

ക്ലാവുപിടിച്ച പിത്തളശില്പം -
പോലെ അവളിരുന്നു
ഉലയിൽ വെച്ചതു പോലെ ചുവന്നു -
നിന്നിരുന്നു സങ്കടം
ആസുരമായി കറുത്തുനിന്നിരുന്നു രാത്രി
കുപ്പിയിൽ കുടുങ്ങിയ ശലഭത്തെപ്പോലെ
പിടിയുന്നു ഉള്ളം
ചിലനേരങ്ങളിൽ
ചുമർക്ലോക്കിലെ സമയസൂചിക്ക്
ഒച്ചിന്റെ വേഗത
(മനസ്സുകൊണ്ട് അവൾ ഓടിക്കൊ-
ണ്ടേയിരുന്നു)

അയാളുടെ കാലൊച്ചയ്ക്കായ്
ഇരുട്ടിലേക്ക് കണ്ണുംനട്ട്
അവളിരുന്നു
ചില യാത്രകൾ ഒറ്റയ്ക്ക്
പുറപ്പെടേണ്ടവയല്ലല്ലോ.