കറുപ്പ്

കറുപ്പിനഴകെന്ന് നിങ്ങൾക്ക്
പാടി രസിക്കാം
കുറിക്കുകൊള്ളുന്ന
വാക്കായെഴുതി വെയ്ക്കാം
കാര്യത്തോടടുക്കുമ്പോൾ
കറുപ്പല്ലേ കണ്ടില്ലെന്നു നടിക്കാം

കഴുത്തിനു മുകളിൽ ഒരുകാലല്ലേ
കാരിരുമ്പിനു മുകളിൽ കുഞ്ഞു -
കല്ലെന്ന പോലെ മാത്രം.
കാര്യമാക്കാനില്ല,
തുറിച്ച കണ്ണിൽ നിന്നും തെറിച്ച_
വാക്കല്ലെ
എനിക്കു ശ്വസം മുട്ടുന്നു

എന്നാണിനി നിറങ്ങളുടെ നീരാളി -
പ്പിടുത്തത്തിൽ നിന്ന്
നീ നിന്നെ ഉപേക്ഷിക്കുക
വംശീയതയുടെ വെള്ളെഴുത്ത് മായ് -
ച്ചുകളയുക
വർണ്ണവെറിയുടെ അധമ കോശത്തെ -
മുറിച്ചെറിയുക

നീതി രണ്ടുതരമാണ്
കറുപ്പും, വെളുപ്പം
ഉള്ളവനും, ഇല്ലാത്തവനും
പക്ഷപാതിത്വം ഹിംസാപരവും
.............
കുറിപ്പ്:
അമേരിക്കയിൽ വർണ്ണവെറിക്കിരയായ ജോർജ് ഫ്ലോയിഡിനെ ഓർക്കുമ്പോൾ