നിന്നിൽ ചാരുന്ന നേരത്ത്

നിന്നിൽ ചാരുന്ന നേരത്ത്
ഞാനൊന്നു നിവർന്നു നിൽക്കുന്നു
നീറി നിൽക്കുന്നൊരോർമ്മകൾ
നേർത്തുനേർത്തലിഞ്ഞു തീരുന്നു

അഴിഞ്ഞ മുടിയിഴയെൻ ചുണ്ടിൽ -
പരതവേ
നൂറുവേരെന്നിലുണരുന്നു
ഒരു കൂമ്പിലത്തണ്ടായിരുന്ന ഞാൻ
ഇലപ്പീലികൾ വിടർത്തുന്നു

നിന്നിൽ ചാരുന്ന നേരത്ത്
ചരിഞ്ഞു വീഴാതെ ചേർത്തു -
നിർത്തുന്നു
തളിരില തെന്നലായി
തഴുകിമെല്ലെ യുണർത്തുന്നു

ഉടലാഴങ്ങളിലോർമ്മതൻ ഉമ്മതന്നു നീ
ഓമനിച്ചെന്നെയുണർത്തവേ
നേർത്തൊരാലസ്യത്തോടെ
ഒരുമരമുടലായ് തളിർക്കുന്നു ശാഖികൾ