ദൈവം എത്രകാരുണ്യവാനാണ്

ദൈവം എത്ര കാരുണ്യവാനാണ് !
പ്രളയകാലത്ത് വെന്തനെഞ്ചുമായി
ഒരു തുള്ളി വെയിലിന് ആർത്തലച്ചതിന്
ഇതാ വെയിലിൻ്റെ ഒരു വർഷപാതം തന്നെ
നമ്മിലേക്കു ചൊരിയുന്നു

ദൈവം എത്ര കാരുണ്യവാനാണ് !
അസുഖമുള്ള കുഞ്ഞിനെ ആശുപത്രിയിൽ -
കിടത്താൻ കാശില്ലാതെ വന്നപ്പോൾ
ചെടിയിൽ നിന്ന് പൂവിനെയെന്നപോലെ
അമ്മയിൽനിന്നും കുഞ്ഞിനെയടർത്തി
രോഗമില്ലാത്ത ലോകത്തേക്ക് കൂട്ടിക്കൊണ്ടു -
പോയിരിക്കുന്നു

ദൈവം എത്ര കാരുണ്യവാനാണ് !
ഈ പട്ടിണിക്കാലത്തും
അന്നത്തിന് കന്നത്തരം കാണിക്കില്ലെന്ന്
എനിക്കുറപ്പുണ്ട് !!
അങ്ങനെ ഈ കാലത്തോട്
ഞങ്ങൾ പ്രതികാരം ചെയ്യുക തന്നെ ചെയ്യും !!!