പിറക്കാതെ പോയത്

അന്ന് ;
നീ നിർദ്ദേശിച്ച സ്ഥലത്ത് ഞാൻ -
കാത്തുനിന്നു
മരണത്തോടു സന്ധി പറഞ്ഞ്
ഇടവഴിയിലൂടെ
ഇരുവഴിയിലൂടെ നാം നടന്നു മറഞ്ഞു

ഇന്ന് ;
യൗവ്വനത്തിൻ്റെ മിനുപ്പുകളെ
കാലം കഴുകിക്കളഞ്ഞ്
പുത്തൻ വരകളും , കുറികളുമിട്ട്
കളി തുടർന്നുകൊണ്ടിരിക്കുന്നു

കവിത പൂത്തഇടവഴികൾ
നാലുവരിപ്പാതയായിരിക്കുന്നു
നാടും, നാട്ടുകാരും എത്ര മാറിപ്പോയി !
എന്നിട്ടും;
അന്ന് നീ നിർദ്ദേശിച്ച സ്ഥലത്ത്
നമ്മളിന്നും നമ്മളെ കാത്തുനിൽക്കുന്നു!