ഉണർന്ന വീടിൻ്റെ
ഉമ്മറക്കോലായിൽ കയറിയിരുന്നു വെയിൽ
വെയിലിനോടും, കാറ്റിനോടും
കുശലം പറയാൻ നേരമില്ല അയാൾക്ക്
അടുക്കളയിൽ
അകത്തളത്തിൽ
കടുകുപാത്രത്തിൽ
ഇടയ്ക്കൊന്നു വരാന്തയിൽ
തിരഞ്ഞ് തിരിച്ചു പോകുന്നു
പിന്നെയും പിന്നെയും
തട്ടിൽ പുറത്ത്
തിണ്ണയിൽ
കിണറ്റിൻകരയിൽ
അടുപ്പിൻ തിണ്ണയിൽ
തിരഞ്ഞു കൊണ്ടേയിരിക്കുന്നു
സഹികെട്ട കാറ്റ് വെയിലിനോട്
എന്തോ പറയുന്നതു കേട്ട്
അയാൾ, കോലായിലേക്കിറങ്ങി -
പറഞ്ഞു:
"എന്നെ ഞാൻ ഇന്നലെ രാത്രി
എവിടെയോ കൊണ്ടു വെച്ച്
മറന്നു പോയി !
ഒന്നു വന്ന് തിരയാൻ സഹായിക്ക് "
വെയിൽ വെളിയിലിറങ്ങി
കാറ്റിൻ്റെ കൈയും പിടിച്ച് വേഗം നടന്നു
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ