ഒരു കുട്ടി,
തിരകളിൽതിരഞ്ഞുകൊണ്ടിരിക്കുന്നു വാക്കുകളെ !
നാക്കിലൂടെ വാക്കിൻ്റെ എരിവ്
വേരുകൾപോലെ അരിച്ചുകയറുന്നു
വേവുന്ന ഒരു കുന്നായവൻമാറുന്നു !!
മടിയുടെ അടിവേര് പിഴുതെടുക്കുന്നു
ആഴിയുടെ അഗാധതയിൽന്നും
പൂഴിയുടെ പുരാതനതയിൽനിന്നും -
വാക്കുകൾ നുരയുന്നു
വാക്കുകളെക്കുറിച്ച് നിങ്ങൾ ഓർത്തി -
ട്ടുണ്ടോ:
അനേകംമരങ്ങൾ കാറ്റിലിളകുന്ന ശബ്ദം -
പോലെ
ഏതോ കൊമ്പിൽമുളയ്ക്കുന്ന തളിരില -
പോലെ
നക്ഷത്രങ്ങൾ പൂത്തിറങ്ങുന്നപോലെ
വാക്കുകൾ ശിക്ഷയും, ശിക്ഷണവുമാണ്
ചിലവാക്കുകൾ മനസ്സിനെമാത്രമല്ല -
ശരീരത്തേയും ഊമയാക്കും
ചിലത് വേരുകളാൽ വരിഞ്ഞുമുറുക്കും
വാക്കിൻ്റെവനത്തിൽ ഒറ്റയ്ക്ക് ഉപേക്ഷിക്കും
നിശ്ശബ്ദമായ ചിലവാക്കുകൾ കുറ്റസമ്മതമാണ്
വേറെചിലത് കടലാസിൽ അലഞ്ഞുതിരിഞ്ഞ്
ആശയക്കുഴപ്പമുണ്ടാക്കുന്നവ
വാക്കുകൾ എത്ര പെട്ടെന്നാണ് വാദിയും,
പ്രതിയുമാകുന്നത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ