കുനുകുനെയെഴുതി
കൂട്ടുന്നു ഞാൻ കവിത
താളിൽ നിന്നു താളിലേക്കു
പതഞ്ഞുകവിയുന്നു
എല്ലാം ചേർത്ത് പ്രസിദ്ധീകരി-
ച്ചൂടേ ?-യെന്നാണെങ്കിൽ
ഇല്ലടോ ചില്ലിയും കൈയിൽ
പിന്നെയെന്തിനിത്രയും
എഴുതിക്കൂട്ടുന്നു ?
എന്നാണെങ്കിൽ
ഒരു കുടം തീ വാരി തിന്ന്
ഒരു തുടം അവശേഷിപ്പിക്കു-
ന്നുയെന്ന്
മരിച്ചുവെന്ത് വെണ്ണീറായാലും
വരികളിൽ ജീവിക്കുവാനെന്ന്
മരിച്ചാലുമെൻ്റെ എഴുത്തു
മുറിയിൽ
മേശയിൽ
മഷിപ്പാത്രത്തിൽ
താളിൽ തിണർത്തും,
തളിർത്തും
"എന്നെങ്കിലും
മെനകെട്ടൊരു മരുമകളോ
നന്ദിയില്ലാതൊരുകൊച്ചുമകനോ
തൂക്കിയെടുത്തെറിയും വരെ "
..........................
കുറിപ്പ് :-
എന്നെങ്കിലും
മെനകെട്ടൊരു മരുമകളോ
നന്ദിയില്ലാതൊരുകൊച്ചുമകനോ
തൂക്കിയെടുത്തെറിയും വരെ "- നാസിം
ഹിക്മത്തിൻ്റെ തുർക്കിഷ് കവിതയിലെ
വരികൾ
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ