"പ്രായം കുറേയായില്ലെ
ഇനി അടങ്ങിയൊതുങ്ങിയിരിക്ക് " -
മകൾ അമ്മയോട് ദേഷ്യപ്പെടുന്നു
'കൊട്ടൻ ചുക്കാതി' - കട്ടിളപ്പടിയിൽ
'ടപ്പേന്ന്' - വയ്ക്കുന്നു.
ഞാനടങ്ങിയിരുന്നോളാം
എൻ്റെയുള്ളിലെ തിര
എങ്ങനെ അടങ്ങും
മനസ്സുകൊണ്ട് ,
നക്ഷത്രങ്ങളെ
എങ്ങനെ നോക്കാതിരിക്കും
കവിത എഴുതാതിരിക്കും
കണ്ണിലേക്കിറങ്ങുന്ന
പുസ്തകത്തിലെ തീ
ജ്വലിക്കാതിരിക്കും
കവികളെ കാണാതിരിക്കും
കവിത വരയ്ക്കാതിരിക്കും
ചിത്രമെഴുതാതിരിക്കും
ദുരിത നടുവിലൂടെ
നെട്ടോട്ടമോടാതിരിക്കും
ചിറകൊടിഞ്ഞ കിളിയുടെ
കുഞ്ഞിലയുടെ ഞരക്കം
കേൾക്കാതിരിക്കും
ഞാനടങ്ങിയിരുന്നോളാം
എങ്ങനെ അടക്കും
കടലിലെ തിര
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ