എന്റെ നാട്

കൂറില്ലാത്തവന് -
കറവപ്പശു
ചെറുമനോട്
ചോറ് നൽകാൻ കൽപ്പന
ചേറണിഞ്ഞവന്
ചേലുള്ളവന്റെ ഭർത്സനം
ചെങ്കോലേന്തിയ ചെകുത്താൻ
ചതിയിലൂടെ നേടിയ വരദാനം.

ചരിത്രത്തിന്റെ ചവറ്റുകുട്ടയിൽ നിന്നും
ചിതലുകൾ കെട്ടിയത്
സ്വർണ്ണക്കൊട്ടാരമെന്ന് ധരിച്ചവർ
സ്വന്തംശവക്കല്ലറ പണിഞ്ഞു വെച്ചവർ.

കൃഷിയിടങ്ങളിൽ പശിമാറാതെ
പാതിരാവിൽ മയങ്ങിയവർ
പീടിക തിണ്ണയിലെ
പട്ടിണിക്കോലങ്ങൾ കാണുന്നില്ല      കാവൽക്കാരന്റെ കള്ള മുഖം.

ഭയന്ന മുയലുകൾ
അഭയംപ്രാപിച്ച ഗുഹ
സിംഹത്തിന്റെ വായ.

പുഞ്ചിരി കണ്ടിരുന്നു
പൊട്ടിച്ചിരിയും
അട്ടഹാസമാകുന്നതെവിടെ നിന്ന്?!
നെഞ്ചിൽ നിറയൊഴിച്ചതോക്കിൽ നിന്നോ
ചരിത്രത്തിന്റെ ചിതലരിക്കാത്ത ഏടിലെ
മരണവ്യാപാരികളിൽ നിന്നോ?