മനുഷ്യൻതന്നെ......!

മനുഷ്യൻ ദൈവത്തിന്റെ സൃഷ്ടിയെന്ന്
പൊതുമതം
മരിച്ചയാൾ സ്വർഗത്തിൽ, നരകത്തിൽ
യെന്ന് ഒരു കൂട്ടർ
ദൈവത്തിലേക്കെന്ന്‌ മറ്റു ചിലർ
പിന്നെയെന്നാണ് കാലൻ കയറി വന്നത്?!

മണ്ണിലെ മനോഹരമായ സൃഷ്ടി മനുഷ്യൻ
പ്രതീക്ഷയുടെ തുരുത്ത്
സ്നേഹത്തിന്റെ കരുത്ത്
മോഹത്തിന്റെ മരുത്ത്

ഏദനിൽനിന്ന് ഏഴുകടലും കടന്നു വന്നവൻ
മൗനത്തിന്റെ തുഹിനവൃഷ്ടി നടത്തുന്നവൻ
പുഞ്ചിരിയുടെ വെയിൽച്ചീളെറിയുന്നവൻ
ദുഃഖത്തിന്റെ മാരിവിതറുന്നവൻ

അവൻ കല്ലിനെ അപ്പമാക്കുന്നു
ജലത്തിനെ വീഞ്ഞാക്കുന്നു

മനുഷ്യനോളം മൃഗം വേറെയില്ല
അവനോളം വലിയ ശത്രു
അവനോളം വലിയ മിത്രം
മനുഷ്യൻ തന്നെ ദൈവം.