ഉണർന്നിരുപ്പ്

തെച്ചി പൂത്തതുപോലുളള

നട്ടുച്ച നോക്കൂ

ഒച്ച വെയ്ക്കാതിരിക്കുക

ഇച്ഛിച്ചത് ലഭിക്കണമെന്നില്ല

ഇഷ്ടങ്ങളെല്ലാം

നഷ്ടമായ്

സ്മൃതികൾ

വിസ്മൃതിയായ്

അസ്ത്രമേറ്റ വസ്ത്രമായി

ശരീരം

വിട്ടു പോയ വാക്കുകൾ

വട്ടമിട്ടു പറക്കുന്നു

മറവിയുടെ മാളത്തിലകപ്പെട്ടവന്

ജീവിതം ശൂന്യതയുടെ അന്ധകാരം 

കാലം ബാക്കി വെച്ച

ഭിക്ഷയാണ് ജീവിതമെങ്കിലും

എന്തോ പറയുവാനുണ്ടാകാം

നടന്നു തീർക്കുവാനുണ്ടാകാം

മറന്നു വെച്ചവയൊക്കെയും

മരിച്ചു പോയവയല്ലെന്ന്

തിരിച്ചുവന്നു പറഞ്ഞേക്കാം

തരിച്ചിരിക്കാതെ കാലം ഉണർ -

ന്നിരിപ്പത് അതുകൊണ്ടാകാം