ഓർമകൾ
ആട്ടിൻകുട്ടികളെ പോലെയാണ്
മേയാൻ വിട്ടാൽ
എന്തൊക്കെ കടിക്കുമെന്ന്
പറയാൻ കഴിയില്ല
ഏതും ഒരു കടികടിക്കും
എന്ന കാര്യത്തിൽ സംശയമില്ല
നിന്നോട് പറയാൻ മറന്ന ഇഷ്ടം
ഞാൻ മറന്നു വച്ച ജീവിതം
മണ്ണപ്പം ചുട്ടതും
മൗനം കൊണ്ട് കണ്ണീരു കുടിച്ചതും
മാങ്ങാച്ചുന പൊള്ളിയ നിൻ്റെ കവിളിൽ
തൊട്ടപ്പോൾ
പൊള്ളിപ്പോയില്ലെ എൻ്റെ ജീവിതം
നോക്കൂ;
ആ റെയിൽപ്പാത
രണ്ട് സമാന്തര രേഖകൾ
ഇങ്ങനെയല്ലാതെ
ഇനി എങ്ങിനെയാണ്
കാലം നമ്മേ വരച്ചു ചേർക്കേണ്ടത്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ